दूर दूर धुक्यांतून
येते सनई मंजुळ :
मावळत्या चंद्रम्याचा
एक किरण कोमळ
दूर दूर धुक्यांतून
येते सनई मंजुळ :
फुलातुळशीचा गंध ,
वाहे गंधाचा ओघळ !
दूर दूर धुक्यांतून
येते सनई मंजुळ :
गार मोगरीदवाची
माळ गुंफिली सुढाळ !
दूर दूर धुक्यांतून
येते सनई मंजुळ :
दुलईच्या उबेतून
जाग उमलत येई !
अशी जेव्हा येते जाग
माझा भाग्यकाळ येतो :
माझा अवघा दिवस
जाईजुईतून गातो !
: सनई
: रंगबावरी
: इंदिरा संत
Comments
Post a Comment