सुंदरता

सुंदरतेचे मोहक दारुण

घडले दर्शन ओझरतेही

तर मग पुढते हे जग बुडते

एकच उरते ओढ अशी ही

क्षण बघतो जो कुणी बिचारा

चिन्मय तारा त्या गगनाची

तो वा-यागत जातो वाहत

छेडत छेडत तार मनाची

नभमुकुरांवर दुरांत दिसते

बिंबच नुसते हिचे जुगारी

उठतातच तर मग सिंधूवर

व्यथित अनावर लहरी लहरी

तिमिरामध्ये नीलारुण घन

मुकेच नर्तन ही करताना

मलय निरंतर करतो हुरहुर

सोडत वरवर श्वास पहा ना!

हे श्रावणघन-गर्जित सारे

वादळवारे, विद्युतरेषा –

ती मिळण्याची विश्वमनाची

कैक दिनांची व्यथित दुराशा

: ना. घ. देशपांडे